Search form

Bel ha'n Dhragon 1

Daniel hag Oferysi Bel

1Wosa myghtern Astyages dhe vos kuntellys dh'y dasow, Syrus an Persyan a dhegemmeras y vyghterneth.+ 2Daniel a veu keskoweth a'n myghtern, hag enorys dres oll y gowetha.

3Y feu idol dhe'n Babylonianys henwys Bel, hag y feu spenys ragdho pub dydh dewdhek bushel a vleus fin, ha dew-ugens davas, ha hwegh musur+ a win. 4An myghtern a wre y enora, ha mos pub dydh dh'y wordhya; mes Daniel a wordhya y Dhuw y honan. 5Yn-medh an myghtern dhodho, ‘Prag na wordhydh Bel?’ Ev a worthybis, ‘Rag ny wordhyav idol gwrys gans leuv, mes an Duw byw, neb a formyas nev ha nor, ha may ma dhodho mestrynses war oll kig.’

6Yn-medh an myghtern dhodho, ‘A ny dybydh Bel dhe vos duw byw? A ny welydh kemmys a dheber hag a yv pub dydh?’ 7Daniel a vinhwarthas ha leverel, ‘Na vydh toellys, A vyghtern; rag nyns yw hemma marnas pri a-ji, ha kober a-ves, ha bythkweth ny dhybris nag eva travyth.’

8Ytho serrys veu an myghtern, hag ev a elwis y oferysi ha leverel dhedha, ‘Mar ny leverowgh dhymm piw yw neb a dheber an vytel ma, hwi a verow; mes mar tiskwedhowgh Bel dh'aga dybri, Daniel a verow, rag ev re vlasfemias erbynn Bel.’ 9Yn-medh Daniel dhe'n myghtern, ‘Bedhes kepar dell leversys.’ Yth esa deg oferyas ha tri-ugens dhe Bel, heb rekna gwragedh ha fleghes.

10An myghtern a dheuth gans Daniel bys yn chi Bel, 11hag yn-medh oferysi Bel, ‘Otta, yth eson ni ow mos yn-mes, mes ty, A vyghtern, sett an boes, ha kemmysk an gwin ha'ga dhesedha. Dege an daras, ha'y selya gans dha vysow-selya. Deus ternos, ha mar ny gevydh pup-tra dhybrys gans Bel, ni a verow; poken Daniel, neb a wowleveris er agan pynn.’ 12Mes nyns ens i troblys, rag yn-dann an voes i re wrussa entrans kudh, ha dredho i a dheuth a-ji pup-prys dh'aga devorya. 13Ytho, pan ethons yn-mes, an myghtern a worras an boes a-rag Bel. 14Ena Daniel a worhemynnis dh'y servysi may trollens lusu, hag i a's skattras der an tempel oll yn golok an myghtern y honan; hag ow mos yn-mes i a dhegeas an daras, ha'y selya gans bysow-selya an myghtern. 15Mes an oferysi a dheuth y'n nos, herwydh aga us, gans aga gwragedh ha'ga fleghes, hag i a dhybris hag eva pup-tra.

16Ternos an myghtern a sevis a-varr, ha Daniel ganso, 17hag yn-medh an myghtern, ‘Yw an selyow dien, Daniel?’ Yn-medh ev, ‘Dien, A vyghtern.’ 18Ena kettell igorsens an darasow, an myghtern a vires orth an voes ha kria gans lev ughel, ‘Meur osta a Bel, ha genes nyns eus toell vytholl.’ 19Daniel a hwarthas, ha synsi an myghtern ma na allas mos a-ji, hag yn-medh, ‘Mir orth an leur, ha merk, dhe biw yw an olow treys ma.’ 20Yn-medh an myghtern, ‘My a wel an olow treys a wer, a venynes hag a fleghes.’ 21Ena an myghtern o serrys. Ev a gemmeras an oferysi ha'n benynes ha'n fleghes, hag i a dhiskwedhas dhodho an darasow kudh dredha may teuthons a-ji, ha konsumya pup-tra esa war an voes. 22Ytho an myghtern a's gorras dhe'n mernans, hag ev a ros Bel dhe Daniel, neb a'n distruis, ha'y dempel.

Daniel a Ladh an Dhragon

23Yth esa ena dragon vras, ha'n Babylonianys a's gordhya. 24Yn-medh an myghtern dhe Daniel, ‘Ny yllydh leverel, nag yw hemma duw byw. Ytho gwra hy gordhya.’ 25Yn-medh Daniel, ‘An Arloedh ow Duw vy a wordhyav, rag Duw byw yw ev. Mes ty, A vyghtern, ro dhymm kummyas, ha my a ladh an dhragon, heb kledha na lorgh.’ 26Yn-medh an myghtern, ‘My a re dhis kummyas.’ 27Ena Daniel a gemmeras pyg ha soev ha blew ha'ga bryjyon war-barth ha gul pellennow; hag ev a's gorras yn ganow an dhragon. Wosa aga dybri, an dhragon a dardhas igor. Yn-medh ev, ‘Ottena an taklow esowgh orth aga gordhya.’

28Pan glewas an Babylonianys henna, i a's teva sorr bras, hag i a guntellas war-barth erbynn an myghtern, ow leverel, ‘An myghtern re dheuth ha bos Yedhow. Ev re dorras Bel dhe'n dor, ha ladha an dhragon, ha gorra an oferysi dhe'n mernans.’ 29Yn-medhons, hag i ow mos dhe'n Myghtern, ‘Delirv dhyn Daniel, poken ni a'th ladh jy ha'th teylu.’ 30An myghtern a welas i dh'y waska yn ter, ytho konstrynys veu dhe dhelivra Daniel dhedha.

Daniel yn Fow an Lewyon

31I a dewlis Daniel yn fow an lewyon, hag yth esa ena hwegh dydh. 32Yth esa seyth lew y'n fow, hag yth esens ow ri dhedha pub dydh dew korf marow ha diw dhavas. Mes lemmyn ny vons res dhedha, may hallens devorya Daniel.

33Lemmyn yth esa yn Yudi Habakkuk an profoes. Ev a vrojyas iskell ha brywi bara yn bolla. Yth esa ow mos dhe'n gwel, dh'y ri dhe'n vysoryon. 34Hag el an Arloedh a leveris dhe Habakkuk, ‘Dog an boes usi genes dhe Babylon, dhe Daniel yn fow an lewyon.’ 35Yn-medh Habakkuk, ‘Arloedh, bythkweth ny welis Babylon, ha ny wonn an fow.’ 36Ena el an Arloedh a gavas dalghenn yn topp y benn, ha'y dhoen er gols y benn, ha'y worra yn Babylon a-ugh an fow, gans son hwyth y anall.

37Ena Habakkuk a armas, ‘Daniel, Daniel, kemmer an boes a wrug Duw y dhannvon dhis.’ 38Yn-medh Daniel, ‘Ty re borthas kov ahanav, A Dhuw, ha ny forsaksys an re a'th kar.’ 39Ena Daniel a sevis ha dybri, hag el Duw a dhaskorras Habakkuk hware dh'y dyller y honan.

40An myghtern a dheuth y'n seythves dydh dhe gyni Daniel. Ev a dheuth dhe'n fow ha mires ynno, hag otta, yth esa Daniel owth esedha ena. 41Ena an myghtern a grias gans lev ughel ha leverel, ‘Meur osta, Arloedh Duw Daniel, ha nyns eus arall saw ty.’ 42Ena ev a'n tennas yn-bann, ha tewlel y'n fow an re a assaysens y dhistrui, ha hware devorys vons a-ragdho.

An Bibel Kernewek 2017

© Kesva an Taves Kernewek (Cornish Language Board) 2004, 2017

More Info | Version Index